كل شركة عندها صورة عايزة الناس تشوفها

سهل تكتب أي حاجة عن نفسك أو عن شركتك..

كل شركة تقريبا عندها تصور واضح جدا عن نفسها، وعايزة العميل يشوفها بطريقة معينة.

العميل غالبا مش مهتم أوي إنت كاتب عن نفسك إيه.. هو بيكون رأيه عنك بنفسه.

ممكن مثلا تكون عامل هوية شكلها Premium جدا، وكاتب على الموقع إنك بتقدم Exceptional Customer Experience..

وبعدها العميل يستفسر عن حاجة فيلاقي المودريتور عندك يقوله:
“باشا بقولك إيه.. هتشتري ولا هتقرفنا؟”

بالنسبة لك دي ممكن تبقى مشكلة بسيطة في خدمة العملاء.. لكن ويا للمفارقة.. ده جزء من البراند.

الحاجات الصغيرة ممكن تهد الصورة كلها

مطعم يصرف ملايين على الديكور والـPackaging والإعلانات.. وبعدها الأوردر يوصل متأخر والأكل بارد أو فيه مشاكل.

شركة Software موقعها يقول إن أهم حاجة عندها Simplicity.. والعميل يلف حوالين نفسه ساعتين عشان يعرف يلغي اشتراكه.

وشركة صغيرة جدا معندهاش مكتب فخم.. لكن كل مرة تتعامل معاهم تلاقي نفس مستوى الخدمة، ونفس الاهتمام، ونفس الجودة.

بعد فترة مين فيهم هيبقى عندك صورة أوضح وأقوى وأفضل عنه؟

ده جزء مهم جدا في موضوع الـBranding بيتنسى أحيانا.

الصورة النهائية = الوعد + التجربة

تقدر تحدد الـPositioning اللي عايزه، وتختار الرسالة، وطريقة الكلام، والشكل اللي تظهر بيه.. ودي كلها حاجات مهمة جدا.

لكن الصورة النهائية بتتكون عند العميل من اللي إنت وعدته بيه مع اللي هو شافه منك فعلا.

من أخطر الحاجات إن يبقى فيه فرق كبير بين الصورة اللي البراند بيبيعها عن نفسه والتجربة اللي الناس بتاخدها منه.

لأن الإعلان ممكن يقنعني أجربك مرة.. لكن التجربة هي اللي هتحدد أنا هصدق الكلام ده بعد كده ولا لأ.

ليه بنقبل ندفع أكتر في براندات معينة؟

وده يفسرلنا ليه أصلا في براندات بنكون مستعدين ندفع فيها أكتر بكتير، رغم إن قدامنا بدائل أرخص وبمستوى جودة قريب منها.

إحنا مش بندفع في المنتج بس.. إحنا بندفع في الثقة اللي اتبنت مع الوقت، وفي توقع واضح إننا هناخد نفس المستوى كل مرة.

وكل مرة البراند بيوفي بوعده، الصورة دي بتثبت أكتر.. وكل مرة التجربة تناقض الكلام، الصورة بتضعف مهما كان الإعلان قوي. . ليه بقى أدفعلك انت أكتر من غيرك؟ ده اللي هتعرفه في المقال الجاي.. خليك متابع الايميل وهيوصك المقال الجاي ان شاء الله